Կիրո Մանոյան. «Սյանը փաթաթված մնալ իմաստ չուներ»

by on 2009/06/26  •  In ԶԼՄ-ներում

Zhamanak.com

Երեկ կեսօրին ՀՀ ոստիկանությունը հրելով, հրմշտելով, որոշ վկայություններով` նաեւ ծեծելով ցրել է «Մարիոթ» հյուրանոցի առաջ ջավախահայերի բողոքի ոչ մեծ ցույցը:Հյուրանոցում իջեւանել էր Վրաստանի նախագահ Միխեիլ Սահակաշվիլին, եւ ջավախահայերը ցանկանում էին Վրաստանի նախագահին մեկ անգամ եւս հիշեցնել Ջավախքում առկա բազմաթիվ խնդիրների մասին` հայազգի գործիչների նկատմամբ բռնությունների ու հալածանքների դեպքերի, դասագրքերի, հայոց լեզվի, եկեղեցու, սահմանային անցակետի հետ կապված: Քիչ անց ակցիայի մասնակիցներին միացել են նաեւ ՀՅԴ երիտասարդական թեւի անդամները` դրոշներով ու ցուցապաստառներով: Ոստիկանները փորձել են հրելով տարածքից հեռացնել նաեւ ՀՅԴ Հայ դատի եւ քաղաքական հարցերի գրասենյակի տնօրեն Կիրո Մանոյանին, որը դիմադրելով ոստիկաններին` փաթաթվել է սյանը ու փորձել այդպիսով կասեցնել ոստիկանների գործողությունները եւ չհեռանալ տարածքից: Դրանից հետո քաշքշոց, ծեծկռտուք է սկսվել կարմիր բերետավորների եւ ջավախքցիների միջեւ:

Միջադեպի վերաբերյալ երեկ երեկոյան փորձեցինք մեկնաբանություն ստանալ ՀՀ ոստիկանության մամուլի եւ հասարակայնության հետ կապերի վարչությունից: Մեր հեռախոսազանգին պատասխանեց Արմեն Մալխասյանը: Լսելով ոստիկանության գործողությունների իրավաչափության մասին մեր հարցը` նա բավական զարմացած հարցրեց. «Ի՞նչ է եղել որ»: Երբ հստակեցրինք, որ խոսքը ոստիկանների եւ ցուցարարների միջեւ տեղի ունեցած ծեծկռտուքի մասին է, որի ընթացքում ոստիկանության կողմից բռնություն է կիրառվել նաեւ ՀՅԴ Հայ դատի գրասենյակի ղեկավար Կիրո Մանոյանի նկատմամբ, Մալխասյանը շարունակեց. «Մի հատ հստակ ասեք, էլի, ես տեղյակ չեմ` ինչի՞ մասին է խոսքը: Ի՞նչ է եղել, էդ հյուրանոցի մոտ ի՞նչ է պատահել»: Ստիպված եղանք բացատրել, որ ողջ օրը ԶԼՄ-ներով տեղեկատվություն է գնում այդ մասին, նաեւ լուսանկարներ կան: «Իսկ ո՞վ է բռնություն կիրառել», – ծոր տվեց Մալխասյանը: «…Այսինքն` նրանք ի՞նչ են ուզել, ոստիկանությունը ի՞նչն է արգելել, բռնություն կիրառել», – հերթական անտեղյակ հարցը հնչեցրեց վարչության աշխատակիցը: Հետո շանթահարված հարցրեց. «Հիմա դուք զապի՞ս եք անում այս խոսակցությունը»` մեղադրելով մեզ իրեն առանց հարցնելու «զապիս անելու» մեջ: Այնուհետեւ հայտարարեց. «Հարցերն ուղարկեք գրավոր» ու անջատեց հեռախոսը:

Դրանից հետո զրուցեցինք ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանի հետ:

– Պարոն Մանոյան, ինչպե՞ս կգնահատեք միջադեպը: Արդյոք իրավաչա՞փ են եղել ոստիկանների գործողությունները` Ձեր կարծիքով:

– Ես չեմ ուզում, որ այսօրվա չակերտյալ իրադարձությունը լինի այն, ինչ հավաքը ցրելու ժամանակ պատահեց, այլ շեշտը դնենք նրա վրա, որ մարդիկ հավաքվել էին Սահակաշվիլու այցելության առիթով իրենց դժգոհությունը, պահանջները Վրաստանի, հատկապես Ջավախքի հայությանը իրենց զորակցությունը հայտնելու համար, բայց երեւի ինչ-որ տեղ, ինչ-որ մեկը քաղաքական որոշում էր կայացրել, որ Սահակաշվիլին պետք է որ ցուցարարներին չհանդիպի` թեկուզ հեռվից հեռու տեսնելով: Եվ ուրեմն` ոստիկանները փորձում էին ամեն կերպ ցրել հավաքվածներին: Նրանց մի մասին հասցրել էին Հյուսիսային պողոտայի սկիզբը` Արամի փողոցի մոտ, մյուս մասին էլ` Տիգրան Մեծ: Ես ցույցին կամ հավաքին չէի մասնակցում, զանգ ստացա, որ այդպիսի իրավիճակ է, քանի որ մեր գրասենյակը մոտ է, իջա` փորձելով ինչ-որ բան կարգավորել: Առաջարկեցի, որ թողնեն գոնե հավաքվեն Ազգային պատկերասրահի առաջ: Պարզապես տեսանելի կարող էր լինել, որ մարդիկ հավաքվել են պաստառներով: Բայց ոստիկանները դա էլ չթույլատրեցին: Հիմա որ տեսնում եմ հատկապես սկզբի հավաքվածներին ինչպես են ցրել, մտածում եմ, որ կարելի էր ավելի հարգալից վարվել սեփական քաղաքացու, հայրենակցի նկատմամբ, մանավանդ որ` իսկապես անվտանգությանը սպառնացող որեւէ բան չկար:

– Պարոն Մանոյան, Դուք ասացիք, որ ինչ-որ մեկը քաղաքական որոշում է կայացրել, որ Սահակաշվիլին պետք է տեղյակ չլիներ բողոքի ակցիայի մասին: Ձեր կարծիքով` ո՞վ է այդ մեկը:

– Չգիտեմ` ով է կայացրել, բայց շատ մարդիկ չկան այս երկրում, որ ոստիկանապետին կամ ոստիկանությանը կարող են հրահանգել: Պարզ է, որ ոստիկանությունը մենակ չէր որոշել քայլերը:- Դուք անձամբ երեկ ականատես եղե՞լ եք բռնության եւ դա ինչպե՞ս եք գնահատում:

– Ես մեկ հոգու վիրավորման մասին գոնե լսել եմ, որ չգիտեմ ինչ հարվածից փոքր արյունահեղություն է եղել, եւ կասկածելու պատճառ չունեմ, պարզապես ժամանակի պատճառով չեմ տեսել: Բայց մնացածը ասում եմ` կարելի էր ավելի նորմալ վարվել սեփական քաղաքացիների հետ: Երբ մարդիկ արդեն հասել են Աբովյան փողոց` հետեւից գալ, հրելը, շատ իմաստ չեմ տեսնում դրանում:

– Կոնկրետ Ձեր նկատմամբ ի՞նչ բռնություն է կիրառվել:- Բռնություն չէ: Փորձում էին բոլորին հրել, ինձ էլ փորձում էին հետ մղել, որ հրապարակից դուրս մնամ: Էս է ընդամենը:

– Պարոն Մանոյան, նկարում Դուք փաթաթվել էիք սյանը…

– …Որ չհեռանամ այդտեղից:

– Իրենց հաջողվե՞ց Ձեզ պոկել սյունից:

– Վերջիվերջո, երբ որ արդեն ցուցարարներին հետ էին տարել, սյանը փաթաթված մնալ իմաստ չուներ:

– Իսկ ինչպե՞ս եք գնահատում, որ ոստիկանությունը հայտարարում է, թե իրենք տեղյակ չեն` ինչ միջադեպի մասին է խոսքը:

– Ոչինչ, իրենց ասածն է: Մեր տեսած մարդիկ Հայաստանի ոստիկաններ էին: Ոստիկանությունում ով ինչ է տեղյակ է` չգիտեմ ես: Նկարները կան, մարդիկ կնայեն, կիմանան:

– Պարոն Մանոյան, իսկ ՀՅԴ-ն մտավախություն չունի՞, որ միջադեպի համար կարող են ՀՅԴ ներկայացուցիչներին, ցուցարարներին մեղադրել, նրանց դեմ հոդված առաջադրվի` իշխանության ներկայացուցիչներին դիմադրություն ցույց տալու համար: Հատկապես որ` Հայաստանում նման պրակտիկա կա:

– Կարող է անեն, բայց մտահոգվելու հարց չունենք մենք էդտեղ: Եթե ուզում են հարուցեն, իրենք գիտեն:

– Չե՞ք պատրաստվում բողոքել նման վերաբերմունքի դեմ:

– Չենք քննարկել այդ հարցը:

Մարինե Խառատյան

Leave a Reply

Your email address will not be published. Required fields are marked *